A thaizing ah cun Lanhtak Puai ca i a rami mi tampi nih khan Jesuh cu Jerusalem khua ah a ra lai ti kha an theih. Cucaah kuhchuk hnah kha an i put i amah don awkah khan an kal i;
“Pathian cu thangthat ko u. Bawipa min in a rami cu Pathian nih thluachuah pe ko seh. Pathian nih Israel siangpahrang cu thluachuah pe ko seh,” tiah an au.
Jerusalem khua chungah an va luh tikah a khuapi in an i tuai i, “Hi pa hi ahodah a si?” tiah mi nih khan an rak hal hna.
“Hi pa hi Galiliram Nazareth khuami profet Jesuh a si,” tiah mi bupi nih khan an leh hna.
Jesuh cu biakinn ah khan a va lut i biakinn chung i chaw a rak zuarmi le a rak cawmi kha a tthawl dih hna i; tangka thlengtu pawl cabuai le laileng zuartu pawl tthutdan zong kha a leh dih hna.
Annih cu, “Cathiang chungah, Pathian nih ka inn cu thlacamnak inn a si lai a ti, tiah aa ttial. Sihmanhsehlaw nannih nih cun mifir kua ah nan ser cang,” tiah a ti hna.
Puai caan lio i Pathian biak awkah Jerusalem i a hung kalmi hna lakah khan Grikmi tlawmpal an i tel ve. Galili peng Bethasaida khuami Filip sinah khan an ra i, “Bawipa, Jesuh hmuh kan duh,” an ti.
Jesuh nih cun, “Mi fapa hi sunparnak nganpi pek ka si caan a phan cang. Biatak kan chimh hna, facang ci pakhat cu vawlei ah tuh a si i a thih ta lo ahcun pakhat lawng a si peng ko. Athih ta lawngah facang mu tampi a chuahter khawh. Aho paoh, a nunnak a dawmi nih cun a nunnak cu a thlau lai; hi vawlei cung i a nunnak a huami nih zungzal nunnak ah cun aa chiah lai.