Sabbath ni cu aa lim cang i zarh khat cung ni hmasa bik ni khuadei kate ah khin Marimagdalin le a dang Mari kha thlan va zoh awkah cun an kal.
Chikhatte ah khin li aa hnin i Bawipa vancungmi pakhat vancung in a rung ttum i thlankhar kha a thawn i a cungah cun a tthu.
Vancungmi nih cun nu kha a thawh hna i, “Nan thinphan hlah u, vailam tahnak thing i khenh chihmi Jesuh nan kawl ti kha ka hngalh.
Amah cu hika ah hin a um ti lo, a chim bantukte khan a tho cang. Ra u law an chiahnak hmun hi ra zoh hmanh u.
Cucaah khulrang in va kal u law a zultu hna kha, thihnak in thawhter a si cang i atu cu nan hmaiah Galiliram ah a rak kal chung cang, khi ka ah nan va hmuh lai, tiah va chim hna u. Cun kan chimhmi hna hi philh hlah u,” tiah a ti hna.
Cucaah i hnawnam ngaiin thlan khan an kir, an thin a phang pah an i lawm pah i a zultu hna va chimh awkah khan an le.
Sihmanhsehlaw biatak cu hihi a si: ‘Khrih cu thihnak in thawhter a si i cucu thihnak chung i aa hngilhmi hna zong kha thawhter an si ve lai,’ tinak aamahkhan a si.
Thihnak cu mi pakhat thawngin a tlun bantukin thawhtthannak zong cu mi pakhat thawngin a tlung ve.
Adam he an i pehtlaihnak thawngin mi vialte cu an thih bantukin Khrih he an i pehtlaihnak thawngin mi vialte cu nunnak ah thawhter an si lai.
“Keimah hi thawhthannak le nunnak cu ka si. Keimah a ka zummi paoh cu a thih hmanh thi sehlaw a nung tthan lai. Cun ahohmanh a nung i keimah a ka zummi cu an thi bal lai lo,” a ti.