Aho nih dah Khrih dawtnak he cun a kan tthen khawh lai? Harnak nih maw, temhinnak nih maw, hremnak nih maw, rawl ttamnak nih maw, pamnak nih maw, thil tihnung nih maw, thihnak nih maw, zeital nih a kan tthen kho hnga maw?
Zeihmanh nih a kan tthen kho lai lo, hi thil vialte hna chungah hin a kan dawtu thawngin kannih cu teitu hna nakin teitu kan si deuh, Zeicahtiah a kan dawtnak he cun zeihmanh nih a kan tthen kho lo ti kha fiang tein a kan hngalh:
Thihnak nih siseh, nunnak nih siseh, vancung i a ummi vanmi nih si hna seh, uktu le tthawnnak nih si hna seh, a tu caan nih siseh, hmailei caan nih siseh, a kan tthen kho lai lo.
Kan Bawipa Khrih Jesuh thawngin kan ta a simi Pathian dawtnak he a kan tthen khotu ding cu sermi thil dihlak ah hin zeihmanh a um lo.
Nan lungput cu Khrih nih a rak ngeihmi lungput kha si seh.
Pathian sinak kha a ngeih zungzalmi a si ko nain hranhram in Pathian tluk si awk kha cuh awkah a rel lo.
Amah lungtho tein cu vialte cu a hlawt dih i sal sinak tu kha aa lak. Minung bantuk ah a cang i minung mui in a lang.
Mi toi ah aa dor i nawlngaihnak lam kha thih tiangin a zulh, vailam cung thihnak kha.
Hi ruangah hin cunglei a sannak bik hmun ah khin Pathian nih a cawi i min vialte lak i amin cungnung bik kha a pek.
Cucaah Jesuh min upatnak caah cun, vancung i a ummi vialte si hna seh, vawleitang vawlei i a ummi vialte hna nih an khuk an i bil lai i Pathian kan pa sunparnak caah cun vawlei i a um mi vialte nih Jesuh cu Bawipa a si, an ti lai.