Ka u le ka nau hna, Pathian nih a kan zaangfahnak a nganmi ruangah hin, Pathian sinah a nung in pekchanhmi raithawinak bantukin i pe tuah u; a rian ah aa pumpemi le cohlan awk a tlakmi si tuah u; cucu biaknak taktak Pathian nan pek awk biaknak cu a si.
Hi vawlei kalning hin kal ve lengmang ti hlah u; sihmanhsehlaw chunglei in Pathian nih nan lungthin kha a dih-umnak in in thleng hna seh. Cu tikah a tthami le Pathian nih a lawmhmi thil le a tlingmi thil kha nan hngalh khawh lai; cucu Pathian duhmi a si.
Cu hnuah cun khua ka hun zoh i mibu nganpi, ahohmanh nih a rel in an rel cawk lomi kha ka hmuh. Annih cu phun kip, ram kip, holh kip le hrin kip chungin a rami an si i:
Bawi tthutdan hmai le Ttufa hmaiah cun puanrang aih in an dir i tuumhnah kha an i put.
Fak piin an au i, kan khamhnak cu bawi tthutdan cungah a tthumi Pathian le Tuufa sinin a rami a si, an ti.
Upa pakhat nih khan a ka hal i: “Puanrang aa aihmi hna hi ahodah an si i khuazei in a rami dah an si,” tiah a ka ti.
“Ka hngal lo, Bawipa, nangmah nih na hngalh deuh lai,” tiah ka leh. Cun a ka thawh i, hi mi hna hi hremnak nganpi a ingmi kha an si, Tuufa thi chungah an puan kha an suk i an puan cu a vaar cang,
Cucaah cun Pathian bawithutdan hmaiah an dir i chun zan in biakinn chungah a rian kha an ttuan. Bawi tthutdan chung i a tthumi nih khan a umpi hna i a ven hna, tiah a ti.