Bawipa rian ttuan ruang i thong i a tlami keimah Paul nih, Pathian nih an auhnak hna he aa tlakmi nunning khan nung u, tiah kan forh hna.
Toidornak lungthin ngei u, lungnem le lungsau in um zungzal u. Pakhat le pakhat i bawm u law cutincun nan i dawtnak kha langhter u.
Pumkhat sinak, Thlarau nih an pekmi hna kha, ngeih peng awkah an funtu hna daihnak hri khan fek tein i ttem u.
Pathian nih an kawh hna tikah ruahchannak pakhat a um a ti bantukte khan pum cu pakhat lawng a um i Thlarau pakhat lawng a um.
Bawipa pakhat lawng a um, zumhnak pakhat lawng a um, tipil innak pakhat lawng a um. Pathian cu pakhat lawng a si i amah cu mi vialte Pa, zeizong vialte Bawi, zeizong vialte chungah rian a tuan i zeizong vialte chungah a ummi a si.
Lungthli in i uamnak le thinhunnak le ingpuannak kha hlaw hna u. I hua ti hlah u, i vawlpam ti hlah u. Huatnak lungthin ngei ti hlah u.
Pathian nih Khrih thawngin an ngaithiam hna bantukin pakhat le pakhat i ngaithiam u.
Nannih cu Pathian dawtmi fa nan si bantukin amah bantuk kha si i zuam u.
Khrih nih a kan dawt i a nunnak kha kan caah a pek bantukin kan nih zong kan nunnak cu dawtnak nih a uk ve awk a si. Khrih nih kan ca i a pekmi a nunnak cu Pathian duhmi raithawinak le pekchanhmi rimhmui cu a si.
Ka u le ka nau hna, kan Bawipa Jesuh Khrih min in kan nawl hna, nan dihlak in pakhat le pakhat lungnge tein um tuah u, i tthen hlah u. Lungthin khat, ruahnak khat in um u.