Pathian hmai le mi vialte, a nungmi he a thimi he bia a ceihtu ding Khrih Jesush Hmaiah, fak piin kan nawl; cun a rat lainak le a pennak in kan nawl fawn; phung kha chim hna.
A caan a rem zong ah a rem lo zongah chim hna; al a hreh ahcun al hna, chimhrin a herh ahcun chimhring hna, a nawl in nawl a hreh ahcun nawl hna law lungsau thin fual in cawnpiak hna.
Cawnpiaknak a hmaanmi kha mi nih an ngaih duh lo i anmah duhnak tu kha an zulh i anmah theih duhmi chimtu dingah cawnpiaktu an lak hna lai caan kha a phan lai. Biatak kha an kaltak lai i minung tuanbia tu kha ngaih an duh deuh lai.
Sihhmanhsehlaw nang cu zeitik caan paoh ah daite le khualu khuataw khak tein um ko; harnak kha in i zuam, Thawngtha karhter kha fak piin i zuam law Pathian nih a kan khawhchan rian vial te kha tuan ko.
Cathiang hi a dihlakin Pathian thawchuahhnawhmi a si i biatak cawnpiaknak caah le palhnak cawnpiaknak alnak caah le palhmi remhnak caah le ding tein nunnak ding cawnpiaknak caah a thahnemmi asi.
Cucaah Pathian riantuantu a simi cu zeizong vialte ah tlamtlingmi a si awk le thiltha phun zakip tuah khawh awkah thilthuam tling tein a ngeimi a si aw asi.
Tlik zuamnak ah khan ka tha a dih-umnak in ka chuah cang; a dongh tiang khitkhet in ka tli cang, zumhnak kha fek tein kaa tlaih zungzal.
Atu cu teinak laksawng nih khan a ka hngah ko cang; cu laksawng cu ka Bawipa, dinnak Bawi nih, cu Ni i a ka pek laimi dinnak suiluchin cu asi. Keimah lawng cu a ka pekmi kha si lai lo, amah a langh lainak dawtnak in a hngah tu vialte zong kha a pek ve hna lai.